केपी ओली १४ वर्ष जेल बसेको लोकतन्त्रका लागि होइन, ज्यान मुद्दामा हो : पौडेल

२०७७ मङ्सिर १८ बिहीबार, काठमाडौं । नेपाली कांग्रेसका वरिष्ठ नेता रामचन्द्र पौडेलले प्रधानमन्त्री केपी शर्मा ओली लोकतन्त्रका लागि नभइ ज्यान मुद्दामा १४ वर्ष जेल बसेको बताउनु भएको छ ।

बिहीबार ब्यास नगरपालिकामा पर्ने बुल्दीखोलामा नवनिर्मित पुल उद्घाटन गर्दै उहाँले भन्नुभयो, “केपी ओली १४ वर्ष ज्यान मुद्दामा जेल बसेको हो । लोकतन्त्रका लागि होइन ।”

जोशमा बुटन चौधरीको हत्या अभियोगमा जेल बसेकाहरुले आफूसँग लोकतन्त्रको गफ गर्न नसक्ने भन्दै एउटा वाक्य लेखेको भए छुट्ने अवस्थामा पनि अस्वीकार गरेर लोकतन्त्रका लागि लामो समय जेल बसेको पनि बताउनुभयो ।

बुधबार तनहुँमा पुल उद्घाटनका लागि जाँदा प्रहरीले नियन्त्रणमा लिएपछि प्रधानमन्त्री ओलीमाथि पौडेल बिहीबार थप आक्रोशित बन्नु भएको थियो ।

कार्यक्रममा नेता पौडेलले ०६२–६३ सालको जनआन्दोलनमा बयलगाढा चढेर अमेरिका पुगिन्न, संघीयता लोकतन्त्रमा पुगिन्न भन्ने व्यक्ति ओली नै भएको भन्दै आक्रोश व्यक्त गर्नुभएको छ ।

राष्ट्रिय, अन्तर्राष्ट्रिय षड्यन्त्रले ओलीलाई राष्ट्रवादी बनाइएको भन्दै विदेशी गुप्तचरसँगको भेटले उनको राष्ट्रवाद उदाँगिएको पौडेलले बताउनुभयो ।
उनले तनहुँको घटनाले प्रजातन्त्रवादीहरु देशैभर जागेको पनि बताउनुभयो । उहाँले अब भ्रष्टाचारविरुद्ध पनि आन्दोलन केन्द्रित हुने बताउनुभएको छ ।

“ठूला–ठूला घोटाला गर्नेहरु, अबौँको काण्डका रचयिताहरुलाई संरक्षण दिन, साना भुरा माछा खाँदै हिँड्ने त्यो अख्तियारलाई पनि ठेगान लगाउने आन्दोलन हुन्छ,” नेता पौडेलले भन्नुभयो, “अबको आन्दोलन अख्तियारको घाँटी समाउने मात्र होइन न्यायीक निकायलाई पनि सावधान गर्ने आन्दोलन हुन्छ । अब यहाँ सत्ता हेरेर फैसला गर्ने ? अब हुन सक्दैन ।”

त्यस्तै, उहाँले तनहुँबाट सुरु भएको सर्वसत्तावादविरुद्धको आन्दोलन उसै नरोकिने चेतावनी पनि दिनुभयो । नेपालमा संघीय लोकतान्त्रिक गणतन्त्रलाई सही अर्थमा साकार नगरेसम्म आन्दोलन नरोकिने उहाँले घोषणा गर्नुभयो ।

फेसबुक प्रतिक्रिया

सम्बन्धित समाचार