विश्वको तुलनामा नेपालमा कोभिड–१९ निको हुने दर बढ्दो, मृत्युदर पनि कम

२०७७ मङ्सिर २६ शुक्रबार, काठमाडौं । नेपालमा कोभिड–१९ निको हुने दर बढेको पाइएको छ । विश्वका तुलनामा नेपालमा निको हुने दर बढेको हो ।

बिहीवारको तथ्याङ्कानुसार विश्वमा निको हुने दर ६९ दशमलव ३ प्रतिशत पुग्दा नेपालमा त्यसभन्दा बढी ९४ दशमलव २ प्रतिशत पुगेको छ । विश्वमा ६ करोड ९२ लाख ५४ हजार ३०० सङ्क्रमित भएका अवस्थामा ४ करोड ८० लाख ९ हजार ४३७ जना निको भएका छन् । बिहीवासम्मको तथ्याङ्कानुसार नेपालमा २ लाख ४५ हजार ६५० सङ्क्रमितमध्ये २ लाख ३१ हजार ६०१ जना निको भई घर फर्किसकेका छन् ।

नेपालमा कुनै समय ६०–६२ प्रतिशत मात्र कोभिड–१९ का सङ्क्रमित निको भएकामा अहिले ९४ भन्दा बढी प्रतिशत पुगेको छ । विगत दुई महीनाको तथ्याङ्क हेर्दा निको हुने दर ६८ प्रतिशतबाट बढेको देखिन्छ । स्वास्थ्य तथा जनसङ्ख्या मन्त्रालयका प्रवक्ता डा जागेश्वर गौतमले नेपालमा सङ्क्रमितको उपचार सेवा राम्रो भएकाले निको दर बढेको बताए ।

“अहिले उपचार सेवा पनि राम्रो भएको छ”, उनले भने, “त्यसैले सङ्क्रमितको निको हुने दर पनि बढेको हो ।” गत असोज २८ गते ६८दशमलव ८ प्रतिशत सङ्क्रमित निको भएका छन् । यस्तै कात्तिक ९ गते ७० दशमलव ६, कात्तिक १६ गते ७७ दशमलव ६ र कात्तिक २६ गते ८० प्रतिशत सङ्क्रमित निको भई घर फर्केका थिए ।

यही मंसिर १९ गतेदेखिको तथ्याङ्क हेर्दा पनि सङ्क्रमित दर बढेको पाइन्छ । मङ्सिर १९ गते ९२ दशमलव ९, २० गते ९३ दशमलव  ४, २१ गते ९३ दशमलव ७, २२ गते ९४, २३ गते ९४ दशमलव १ र २४ गते ९४ दशमलव ३ प्रतिशत सङ्क्रमित निको भएका छन् । बिहीवार मात्र मन्त्रालयले सार्वजनिक गरेको तथ्याङ्कानुसार ९४ दशमलव २ प्रतिशत सङ्क्रमित निको भएका छन् । सो दिन १ हजार ६४ जना निको भई घर फर्किएका थिए ।

शुक्रराज ट्रपिकल तथा सरुवा रोग अस्पतालका निर्देशक डा सागरराज भण्डारीले उपचार पद्धति अन्य मुलुकको जस्तो भए पनि अहिले लक्षण नभएका सङ्क्रमित घरमै बसेर निको हुने गरेको बताए ।उनले परीक्षण नै कम भएकाले सङ्क्रमित पनि कम हुने भएकाले निको हुने दर बढेको जिकिर गरे । सशस्त्र प्रहरी बल अस्पतालका डा प्रवीण नेपाल परीक्षण नै कम भएर सङ्क्रमणको दर पनि कम देखिनाले निको हुनेको सङ्ख्या बढेको बताउँछन् ।

मृत्युदर कम     

यस्तै नेपालमा विश्वका तुलनामा मृत्युदर पनि कम छ । पछिल्लो तथ्याङ्कमा नेपालमा सङ्क्रमितमध्ये शून्य दशमलव  ६७ प्रतिशत मात्र मृत्यु हुने गरेको पाइएको छ । प्रति १० लाखमा ५६ दशमलव ५ जनाको मात्र मृत्यु हुने गरेको छ । नेपालमा अहिलेसम्म १ हजार ६६३ जनाको सङ्क्रमणका कारणले निधन भइसकेको छ ।

विश्वमा २ दशमलव ३ प्रतिशत सङ्क्रमितको कोभिड–१९ का कारणले मृत्यु हुने गरेको पाइएको छ । विश्वमा १५ लाख ७६ हजार ८५ जनाको सङ्क्रमणको कारणले निधन भएको छ । रासस

फेसबुक प्रतिक्रिया

सम्बन्धित समाचार