दुई दिनदेखिको अविरल वर्षाका कारण भीमदत्तनगर आसपासका बस्ती डुबानमा

२०७७ असार २४ बुधबार, भिमदत्तनगर । दुई दिनदेखिको अविरल वर्षाका कारण कञ्चनपुरको भीमदत्तनगर बजार र आसपासको क्षेत्र डुबानमा परेको छ। ढल व्यवस्थापनको अभाव र पानीको निकास नहुँदा भीमदत्तनगर नगरपालिका-१८ बागबानी, वडा नम्बर १५ को निम्बुखेडा, जानकी टोल, सालघारी, गोवरिया बजारको सब्जीमण्डी, वडा नम्बर ६ को ऐठपुरको राजमार्ग क्षेत्रका केही घर डुबानमा परेका छन्।

जिल्ला प्रहरी कार्यालय कञ्चनपुरका प्रवक्ता प्रहरी नायब उपरीक्षक अमरबहादुर थापा क्षेत्रीले पानीको निकास नहुँदा यहाँका केही घरमा पानी पसेको जानकारी आए पनि अवस्था सामान्य रहेको बताए।

‘भीमदत्तनगरपालिका-१३ झोलुङ्गे पुल छेउको प्रहरीचौकीमा पनि पानी जम्मा भएको खबर आएको छ’, उनले भने, ‘निकास नहुँदा जलमग्न भए पनि क्षति भएको छैन।’ बजारको उत्तरतर्फका खोला, खहरे होला मासिँदा पछिल्ला वर्षमा डुबानको समस्या हुँदै आएको छ।

कञ्चनपुर र कैलालीका अधिकांश भागमा रातिदेखि निरन्तर वर्षा हुँदै आएको छ। त्यसैगरी कञ्चनपुरको भीमदत्तनगरपालिका-१८ बागबानीमा डुबानमा परेका केही घरका स्थानीयवासीलाई सशस्त्र प्रहरीको सहयोगमा उद्धार गरिएको छ। स्थानीयवासीलाई उद्धार गरी स्थानीय राधाकृष्ण मन्दिर परिसरमा व्यवस्थापन गरिएको भीमदत्तनगरपालिका कार्यालयले जनाएको छ।

फेसबुक प्रतिक्रिया

सम्बन्धित समाचार